Wednesday, November 28, 2007

NA LALI

E yaya vakamareqeti na lali ka sega ni dau qiri vakaveitalia. E dau qai qiri ga me vaka na i vakaro mai Vale Levu ka dau i tavi nei matanivanua me raica na kena taqomaki na lali ka dredre sara me vakasausataki. E na gauna e liu e dau vakayagataki na lali me vakadewataki kina nai tutukutuku mai Vale Levu ka vakaraitaka na duidui ni veimataqali qiriqiri ni lali kei na kedra i balebale yadudua.

Ni sa yaco mai na Lotu, sa mudu vakadua kina na kena rogoci e so na i qiriqiri ni lali. E na gauna makawa, e kilai vakavinaka sara tu ga vei ira na lewe ni vanua na ka e vakaibalebaletaki kina ni ra rogoca na veimataqali qiriqiri ni lali.
Oqo e so na kena veimataqali:

Vakotokoto
Na lali oqo e vakaraitaka na vakusakusa se soqoni vata yani kina dua na vanua sa macala oti tu. Ni dau qiri na lali oqo, e ra sa maqusa sara na lewe ni vanua ka ra vakusakusa se vakatotolo yani.

Lali ni Tabua
Oqo na lali e vakaraitaka ni sa ciqomi na tabua se kamunaga ena gauna ni tiko leqaleqa se gauna ni valu. O koya e qiri taumada e vakatokai me “kaba bu”

Lali ni Kaba Koro
Ni sa rogo na lali oqo, sa kilai sara ni sa yaco na leqa, sa kabai na koro. E ra sa sega tale ni wawa na lewe ni koro e na nodra sa kau yani na katikati kina koro ni valu me ra laki taqomaki kina.

Lali ni Bokola
E vakatukituki na lali oqo me vakaraitaka ni sa vakarau biu kina lovo e dua na bokola me vavi. Ia, na derua ni lali e qiri me kilai kina ni sa kau e dua na bokola ki na koro me laki laukana. E tau ya lima na kena veiyawaki, oti e qai tau tale vakarua ka vakaleleka ga.

Lali ni Burekalou
Oqo na lali ni veikacivi kina burekalou, me laki caka kina na sokalou, ni sa oti mai na i valu ka sa nodra mai na qaqa.

Lali ni Sautu
Oqo na lali ni vakacegu, me vakacegu na yalo kei na yago. Sa mudu na i valu, E rau sa veisaututaki ka veiyaloni na i to ruarua.

Lali ni Waqa
Oqo na lali ni sa vakarau udu mai e dua na waqa vakaturaga. E dau qiri na lali me ra vakarau na lewenivanua.

Lali ni Vakataratara
E qiri ni sa oti na vakabogi va ni sa bulu oti e dua na Turaga. Oqo me kilai kina ni sa oti na vakatatabu.

Lali ni Mate
Oqo na lali ka vakaciriloloma na kena i rogorogo. E dau tuki sara vakamalua me vakaraitaka na vakaloloku ka qiri ni sa vakarau maroroi e dua na yago ni mate. E dau duidui talega na i qiriqiri ni lali ni mate dua na Turaga Bale me dua na Turaga Lalai ga.

Lali Vutu
E marautaki ni rogoci na lali oqo ka i vakaraitaki ni sa mamada na marama mai Vale Levu ka turaga na vulagi. Sa tawa take na vanua.
E na qai vakuri tale yani .....Fijituwawa.com Research Team

2 comments:

Malia said...

sa ka yaga saraga vei keirau kei watiqu na i vakamacala e vasoqoni kina website oqo...vinakavalevu na veiqaravi vei keimami sa tiko vayawa mai na neitou vanua dina...kere2
ke rawa, vakuri mada eso tale na legends ki na audio files, sa bau maleka sara na vakarorogo...
vinavalevu

Fijituwawa News said...

Bula Malia,

Vinaka vakalevu na soli vakasama tiko mai me baleta na veiulutaga vakaviti ena Fijituwawa.com. Sa toso tiko ga vakamalua na veiqaravi ka na vakarau caka tale na katokatoni ni talanoa makawa vakaviti ena Audio me ra vukei kina na i taukei, o ira na lalai kei keda kece na sa mai tu oqo e vanua tani.

Keitou sa vakanuinui vinaka tu yani vei kemudrau vakaveiwatini. Tou qai veitaratara tiko.

Moce mada,

Fijituwawa.com
Admin Team